Balot na balot
Tanggap ko na na mahina talaga si Pangulong Benigno ‘Noynoy’ Aquino III bilang administrator ng bayan. Kasama na sa kanyang kahinaan na ‘yan ang pagpili ng mga tao na kasama niya sa pagpatakbo ng bayan.
Ngunit hindi ko akalain na ganu’n siya at ang kanyang mga kasamahan kawalang alam tungkol sa ordinaryong pamumuhay ng Filipino. Dito sa isyu ng tanim-bala, lumabas talaga angkawalan ng kakayahan mamuno ni Aquino.
Isa pa itong si Mar Roxas na kandidato ng Liberal Party (LP) sa pagka-presidente sa 2016. Inindorso siya ni Aquino para raw ipagpatuloy ang kayang Tuwid na Daan. ‘Yung naman ang isinusulong ni Roxas sa kanyang kampanya.
Hindi nakapagtataka.
Noong isang araw, sinabi ni Roxas sindikato raw ang may kagagawan ng tanim-bala sa NAIA na maliban sa perwisyo na binibigay sa mga kawawang biktima ay naging malaking kahihiyan para sa Pilipinas. Kailangan daw mapanagot ang mga may kagagawan nito.
Maganda pakinggan. Kaya lang, bakit ngayon ka lang nagsalita? Mag-iisang buwan na ang isyu at hindi ninyo pinansin ‘yan. Hello??
Sabi ni Press Sec. Sonny Coloma noong isang buwan nang ibinalita ang pagditene sa isang 56 taong gulang na OFW papuntang Hongkong dahil may nakitang bala sa kanyang maleta, na masyado naman daw pinapalaki ng media ang isyu samantalang libu-libo raw ang dumadaan sa NAIA. “Iilan lang naman ang ganitong mga nakitaan ng bala,” sabi niya.
Si Transportation Sec. Joseph Abaya kumpleto pa ang statistics. Ang dumadaan daw na pasahero sa NAIA ay 32 milyon.
Ang nahulihan daw ng may bala ay 1,510 na 0.004 percent lang daw ‘yan ng 32.4 milyon.
O, ‘di ba kayo bilib sa mga tao ni Aquino? Akala nila maresolba nila ang problema sa statistics, ano.
Sabi nga ni Rene Almendras, secretary to the cabinet at isa sa pinakamalapit sa Pangulo: “It wasn’t President Aquino who put the bullet there or Secretary Abaya. Did they tolerate an initiative like this? I don’t think so.”
Hindi naman daw si Aquino at si Abaya ang nagtatanim ng bala sa maleta ng mga pasahero. Nagtataka siya kung bakit sila ang sinisisi.
Ito ang sinasabi ko na hindi ko akalain na ganyan sila kahina. Hindi kasi maganda pakinggan kapag sinabing kong “tanga.”
At sino ang sisihin ng taumbayan? Kanino ba responsibilidad ang ayusin ang pagpatakbo ng NAIA? Kanino responsibilidad ang protektahan ang taumbayan sa mga kriminal?
Sabotahe daw sa administrasyong Aquino.
Mabuti naman at iniimbistigahan nila ngayon ang mga sindikato na gumagawa nu’n.
Dati kasi ang linya nila ay sinasabotahe raw si Aquino at si Mar Roxas.
Sabotahe o sindikato man ‘yun, responsibilidad pa rin ‘yun ng namumuno ng bansa na alamin at parusahan ang may kagagawan nu’n para mahinto.
Huwag naman sabihin na pati ‘yan hindi nila alam.
