Abante | Prepys' Homepage

Ayun sa doktrina ni PNoy, basta maganda ang intensyun, walang batas-batas

July 12, 2014July 12, 2014 Ellen Leave a comment

Basta tama ang intensyun ko, walang mali. Anong unconstitutional?

Ngayon na klaro na ang doktrina ng Tuwid na Daan galing mismo kay Pangulong Aquino, pwede na natin gawin ang gusto natin gawin, basta lang maganda ang intensyun, pasado lahat yan.

Sa cabinet meeting noong Biyernes, inanunsyo ni Aquino na hindi niya tatanggapin ang resignation na inihain ni Budget Secretary Butch Abad kahit sinimplang sila ng malakas (13-0, unanimous, walang nag-disagree) ng Supreme Court sa hindi naayon sa Constitution na Disbursement Acceleration Fund o DAP.

Sabi ni Aquino:“I have decided not to accept his resignation. To accept his resignation is to assign to him a wrong and I cannot accept the notion that doing right by our people is wrong. (Nagdesisyun akong hindi tanggapin ang resignation niya. Kung tanggapin ko ang resignation niya, ibig sabihin noon, may ginawa siyang mali. Hindi ko matanggap ang sinasabi na ang paggawa ng tama para sa taumbayan ay mali.)”

Palakpak, palakpak!

Siyempre palakpak ang miyembro ng gabinete niya . Maliban kay Bise-Presidente Jejomar Binay na miyembro ng cabinet bilang chairman of the Housing Urban Development Coordinating Council.

Ito naman kasing Supreme Court sinabi na labag daw sa Constitution ang ginawa ni Aquino at ni Abad na hinokus-pokus ang budget. Ang pera para sa mga proyekto na inapbrubahan ng Kongreso ay kinuha at ginamit sa ibang proyekto. Mali yun sabi ng Supreme Court.

Ang malaking parte ng bilyun-bilyun pesos nakuha sa pag hokus-pokus ng budget na yun ay napunta sa mga senador at kongresman para sa kanilang kooperasyun sa pagpatalsik kay dating Chief Justice Renato Corona. Suhol, sa simpleng salita.

Sa doktrina na pinalabas ni Aquino noong Biyernes, basta maganda ang intensyun mo at ginagawa mo ay para sa taumbayan, walang ilegal doon. Anong sinasabing labag sa Constitution? Wala yun. Siya ang presidente at siya ang magsasabi kung ano ang tama.

May reklamo kayo?

Bago kayo sumagot, alalahanin nyo popular siya ayon sa mga survey ng Social Weather Station at Pulse Asia.
Kaya palakpak na lang tayo.

Kaya lang bakit Malacañang lang ang palakpakan?

Palakpakan na rin natin ang New People’s Army sa kanilang pagpatay ng mga sundalo at mga taong nasa paniwala nila ay nagpapahirap sa taumbayan dahil ang kanilang adhikain ay mapalaya ang sambayanang Pilipino sa mapang-api na mga nasa kapangyarihan.

At yung mga bumabatikos kay Ferdinand at Imelda Marcos, magbasa kayo ng kasaysayan. Kaya idineklara ni Marcos ang martial law para maligtas ang bansa sa kumonismo.

At di ba ang mga pinatayo ni Imelda Marcos na mga gusali –Cultural Center, Coconut Palace, PICC (sayang nga ang Film Center gumuho,nalibing tuloy ang mga constructor workers doon) at iba pa ay para yun sa mamamayang Pilipino. Wala siyang masamang intensyun. Ang gusto lang naman niya ay ang “The True, the Good and the Beautiful” di ba?

At palakpakan natin ang mga nagsa-salvage ng mga sukpek kuno sa illegal drugs o bank robbery. Ang pakay daw nila ay peace and order. Wala silang paki-alam kung labag sa batas ang pagpatay ng tao na hindi dinadala sa hustisya.

Ayun sa doktrina ng Tuwid na daan ni Pangulong Aquino, tama yan.

May reklamo?

Nakakaduda na ang kilos ng pamahalaan sa kaso ni Napoles

April 26, 2014April 26, 2014 Ellen Leave a comment

Hindi naman siguro tanga si Justice Secretary Leila de Lima para hindi niya maisip kung bakit pilit na gusto makipagkita sa kanya si Janet Napoles at gusto kumanta.

Maraming pagkakataon si Napoles na magsabi ng buong katotohanan tungkol sa panloloko at pagnakaw ng bilyun-bilyon na pera sa taumbayan ngunit hindi niya ginawa. Nang dumalo siya sa hearing ng Senate Blue Ribbon Committtee, wala siyang sinabi. Puro wala siyang alam samantalang nanumpa siya na magsabi na buong katotohanan. “Nothing but the truth,” sabi sa kanyang oath.

Iba na raw ang kuwento ni Napoles nang binisita ni De Lima sa Ospital ng Makati. Nagdawit pa raw siya ng maraming senador at congressman. Merong may nagsabi na 19 na senador daw ang sa kanyang affidavit, meron namang nagsabing 12.

Ngunit hindi raw nila pinag-usapan ang pagiging state witness ni Napoles.

Sinong tanga ang maniniwala na kakanta si Napoles na walang kapalit? Konsyensya daw.

Ginu-goodtime lang tayo nito. Pumayag naman si De Lima sa drama. Halata namang nagta-trial balloon lang sila.

Mabuti naman at umalma ang publiko. Kasi naman kung gawing state witness si Napoles kapalit ng kanyang pagsabi ng katotohanan kuno tungkol sa raket ng PDAF (Priority development Assistance Fund), idi-dimis na lahat na kaso laban sa kanya.

Ang swerte naman niya kung mangyayari yan. Limpak na limpak na salapi na ang kanyang nakuha sa taumbayan. Nakabili na ng maraming ari-arian kasama pa ang isang hotel sa Amerika. Hindi lang siya, pati na rin ang kanyang mga galamay kasama na doon si Ruby Tuason at si Dennis Cunanan, na kumita na rin ng husto.

Magandang raket yan at sigurado marami ang gagayq. Magnakaw ng husto. Dapat malakihan kasi kapag maliit, baka mabulok ka sa kulungan. Isama mo ang mga malalaking tao rin. Kapag nagpalit ng administrasyon at mahuli ka, kumanta ka at libre ka na. Kumita ka ng bilyun-bilyon na walang pagod.

Kaya tama ang sabi ni Sen. Antonio Trillanes IV na kung gusto ng pamahalaang Aquino gawing state witness si Napoles (kahit na tagilid ito sa batas dahil isa siya sa may malaking papel sa anomalya), kailangan ibalik niya ang kanyang ninanakaw. Umabot daw sa P10 bilyun ang nawalang pera na dapat ay napunta sa mahihirap na Pilipino. Dapat ibalik niya yan. Baka P10 milyun lang ang ibabalik niya.

Sabi ni Trillanes:”Definitely may conditions, like isosoli mo lahat ng ninakaw mo. Pangalawa, kailangan hindi ka magpipigil. I believe this thing should not be looked solely at the legal perspective kasi merong greater interest of the state na kailangan nating malaman kung sino talaga ‘yung mga kakontsaba niya, mga ka-partners niya in crime. Kasi imagine this, if we would be a stickler to what the law says, sige hindi siya pwedeng candidate for state witness as defined, pero hindi mo na naman nakita kung sino ‘yung mga senador at mga congressman na involved. So they’re still out there. They’re crafting policies. They’re probably committing acts of corruption still. ‘Di ba mas maganda na sigurong mas makita natin ‘yun, na ito siya, pagbigyan na natin.”

Sa “hindi magpapapigil”, ang ibig sabihin ni Trillanes, dapat buong katotohanan sabihin niya. Hindi pwedeng pipiliin lang niya kung sino ang didi-in niya.

Kaya balik tayo sa bakit ba kailangan pa si Napoles para maging state witness. Akala ko ba malakas na ang kaso laban sa tatlong senador – Juan Ponce Enrile, Jinggoy Estrada, Bong Revilla – at iba pang akusado.

Di ba sabi ng Ombudsman may basehan na ang kasong plunder at paglabag ng anti-graft law sa mga testimonya nina Benhur Luy at ng kanyang mga kasamahan? At ano ngayon ang mangyayari sa kaso ni Luy laban kay Napoles na illegal detention?

Ano ba ang nangyayari? Nakakaduda na ha. Mukhang ginugulo na lang. Bakit sumasakay si De Lima?

Bagsak si Aquino sa pagsubok sa krisis

November 17, 2013November 17, 2013 Ellen Leave a comment

Aquino inspecting relief efforts for victims of typhoon Yolanda.

Ang krisis sa buhay ng tao ay isang pagsubok. Dito makikita ang tatag o kahinaan ng isang tao.

Merong iba na magaling sa pangaraw-araw na gawain, lalo pa sa panahon ng sagana at kaayusan. Ngunit pagdating sa krisis, sa sitwasyun ng kakulangan at pahirapan, wala na.

Mas matindi ang hamon sa mga lider.Tatlong taon na si Pangulong Benigno Aquino III sa Malacañang. Popular siya. Magaling ang kanyang mga tauhan niya sa pagbenta sa kanya. Gusto siya ng mga tao dahil hindi siya corrupt.

Kaya lang bilang presidente, hindi lang sapat na hindi ka magnanakaw. Kailangan, magaling ka na lider. At ang magaling na lider ay hindi lang tapat sa tungkulin kungdi marunong sa organisasyun at magpatakbo ng bayan. Lalo na sa oras ng gipit at emergency.

Sa dami ng krisis na nangyari sa bansa, dalawa ang umaalsa at tumatak sa buong mundo: ang panghu-hostage ng mga turista na taga-Hongkong sa Luneta noong Agosto 23, 2010 at ang bagyong Yolanda na na bumayo sa Visayas noong isang linggo.

Hanggang ngayon hindi pa sarado ang epekto ng nangyari na kapalpakan noong nang hostage ang isang pulis sa Luneta. Walo ang patay. Nakita doon ang kawalan ng liderato sa Malacañang.

Pwede sigurong pagpasensyahan yun dahil dalawang buwan pa lang siyang presidente noon. Ngunit itong nangyari sa Leyte, Samar at iba pang parte ng Visayas pagkapatapos ang pananalasa ni Yolanda ay talagang nakakadismaya na nakakagalit dahil palpak na nga, mayabang pa.

Sa interview sa local na media at kay Christian Amanpour ng CNN, ang pinagdidikdikan niya ay kakulangan ng lokal na pamahalaan (talaga naman itong si Alfred Romualdez ay isa ring opisyal na sayang ang binabayad ng taumbayan) at hindi raw 10,000 ang patay. Sobra lang daw 2,200.

Bakit kung 2,200 ba kalimutan na lang ang kakulangan ng pamahalaan? Kahit isa lang, dagok pa rin yun. Buhay pa rin yun.

Ang solusyun nila, tanggalin sa puwesto si Chief Superintendent Elmer Soria, ang opisyal na nagbigay ng 10,000 casualties na estimate, sa kanyang puwesto. Ngayon tumataas na ang bilang. Umaabot na sa sobra 4,000 at hindi pa rin naman nakuha ang bilang ng mga nasawi sa liblib na mga barangay. Paano ngayon yan?

Tatlong taon pa si Aquino sa Malacañang. Sana naman natuto na siya. Hindi natin maiiwasan ang krisis. Huwag naman sana tayo magkakaroon ng krisis sa liderato.

Sobrang amazing ang kuwento ni Kap

September 22, 2013September 22, 2013 Ellen Leave a comment

Sponsors do not want to be seen supporting someone acccused of plunder

Malakas ang ugong na baka mawala sa ere ang Kap’s Amazing stories, ang show ni Sen. Bong Revilla sa GMA7. Nagkakakansela na raw ang advertisers ng show at hindi maganda para sa kanila na ma-identify sa isang opisyal ng pamahalaan na akusado sa krimeng pandarambong.

Ang buhay talaga. When it rains, it pours. Kapag umulan, talagang buhos.

Noong isang linggo, kasama sa sinampahan si Revilla ng plunder o pandarambong. Ayun sa dokumento na hawak ng National Bureau of Investigation, si Revilla ang may pinakamalaking nabulsa mula sa pera ng PDAF (Priority Development Assistance Fund) sa pamamagitan ng operasyun na kasabwat si Janet Lim Napoles.

Ayun sa dokumento ng NBI, P224,512,500 ang pera na naman sa mhihirap na Pilipino ang napunta kay Revilla. (Ang kay Sen. Jinggoy Estrada ay P183,793,750 at kay Sen. Juan Ponce Enrile ay P172,834,500.)

Close friends

Maiyak-iyak si Revilla noong Lunes at sinabi niyang “Ang hiling ko sa sambayanan, huwag kaming husgahan. Ipapaliwanag namin ito hanggang sa kahuli-hulihang detalye.”

Nakadetalye ang kuwento ni Ben Hur Luy, ang dating kanang kamay ni Napoles, tungkol sa mga perang binibigay nila kay Revilla at sa ibang mambabatas at kanilang mga tauhan na sangkot dito sa pork barrel scam.

Ang baho ng pangalan ng lahat na sangkot sa pork barrel scam kaya maintindihan kung magkaka-kansela ang mga advertisers ng Kap’s Amazing stories.

Sabi naman ni Revilla kumuha na daw siya ng handwriting expert para daw suriin ang mga dokumento sa PDAF na may pirma niya.

Sayang itong si Revilla na hindi pinahalagahan ang tiwala na binigay sa kanya ng mamamayan. Kahit wala naman talagang pinakitang galing sa kanyang panunungkulan sa Senado, binu-boto pa rin siya ng tao. Sa halip na alagaan ang pagtitiwala ng taumbayan, ginawang gatasan ang pamahalaan. Ninakawan pa ang mamamayan.

Really close friends

May ambisyon pa siyang tumakbo bilang maging bise president kung hindi man presidente sa 2016. Sa pagbulgar ng kanilang pangungurakot ng pork barrel, pwede na magpa-alam si Revilla sa kanyang ambisyun na titira sa Malacanang o kahit na mago-opisina sa Coconut Palace.

Ang problema niya ngayon, ay kapag nagdesisyun ang Ombudsman na may basehan ang akusasyun at magsasampa na ng kaso sa Sandiganbayan, mai-isyu ng warrant of arrest. Walang piyansa ang plunder kaya kulong siya.

Itong linggo daw, magpapasabog din daw si Revilla at Estrada. Excited na ako makinig. Baka sobrang amazing yun.
***
Ang tanong ng isa: paano ang bahay ng isang beauty queen sa Beverly Hills na mistress daw ng isang akusado na ang bumili daw ay si Napoles. Naku, baka binenta na yan. Ang bahay sa Beverly Hills hindi bababa sa $1.5 milyon o mga P65 milyon.

Anong ipalit sa PDAF? BDAF

August 24, 2013August 24, 2013 Ellen Leave a comment

Kunyari lang “abolish.”

Akala ng Malacañang naloko na nila ang mga tao, ano.

Noong Biyernes, kasama pa niya si Senate President Franklin Drilon at House Speaker Feliciano Belmonte, inanunsyo ni Pangulong Aquino . Sabi niya “Panahon na po upang i-abolish ang PDAF.”

May ilan na pumalakpak kaagad.

Ngunit kung babasahin o pakinggan mo ng masinsinan ang sinabi ng Presidente, hindi niya aalis ang sistema ng pork barrel na ang paggastos sa isang proyekto at pagpalabas ng pera ay hindi sa paraan na ayon sa nasyunal na plano. Ang pork barrel ay depende sa mga senador o congressman at presidente.

Hahanap daw sila ng bagong paraan. Sabi ni Aquino:“Maghanap ng mas mainam na paraan upang siguruhing ang pera ng taumbayan ay mapunta sa taumbayan lamang.”

Ito pa ang sabi ng Pangulo:

“Ngayon, bubuo tayo ng bagong mekanismo upang matugunan ang pangangailangan ng inyong mga mamamayan at sektor—sa paraang tapat, gamit ang tama at makatuwirang proseso, at nang may sapat na mga kalasag laban sa pang-aabuso at katiwalian.

“Katuwang nina Senate President Frank Drilon at Speaker Sonny Belmonte, sisiguruhin kong bawat mamamayan at sektor ay makakakuha ng patas na bahagi ng pambansang budget para sa serbisyong pangkalusugan, scholarship, proyektong lumilikha ng kabuhayan, at lokal na imprastruktura. Makakapagmungkahi ng proyekto ang inyong mga mambabatas, ngunit kailangan itong idaan sa proseso ng pagbubuo ng budget. Kung maaprubahan, itatalang mga ito bilang mga line item, alinsunod sa mga programa ng Pambansang Pamahalaan. Mapapaloob ito sa batas bilang Pambansang Budget—hihimayin ang bawat linya, bawat piso, bawat proyekto, gaya ng lahat ng iba pang mga programa ng inyong pamahalaan.”

Naloko na. Pareho din pala. Manggaling din si Kongreso ang proyekto at siya ang aapruba. Di lalong mapunta sa kanya ang kapangyarihan sa pork barrel. Lahat ngayon yuyuko sa kanya para maparubahan ang kanilang mga proyekto.

Ang galing talaga ni PNoy at ng kanyang mga advisers. Naramdaman nila ang umiigting ang galit ng taumbayan sa pagwawaldas ng pera na dapat ay sa mga mahihirap. Sa Lunes, maigiipon-ipon ang mga taong sawa na sa panloloko sa kanila sa Rizal Park mula 9 ng umaga. Kaya nagpalabas ng ganitong anunsyo si Aquino.

Hindi naman lahat naloko nila. Sinakyan na lang nga ng iba at nagbigay pa sila ng bagong pangalan. Alisin na ang PDAF (Priority Development Assistance Fund). May suggestions ang Spinbusters: “House Allocation Mechanism (HAM)”. Pwede rin “ Senate Priority Assistance Mechanism (SPAM)” o Priority Initiative of Government (PIG).”

Si Lynda Jumilla ng ABS-CBN, humingi ng mga ideya sa Twitter ng mga pangalan na ipalit sa PDAF at sabi ng isa, BDAF (Benigno Aquino Development Assitance Fund). Mas bagay ito.

Click here for the English version of the President’s announcement.